Астанасы: Пекин

Тілі: қытай

Валютасы: юань (1 CNY ≈ 62,54 KZT)

Уақыты: UTC+8, Қазақстаннан айырмашылығы – 3 сағат

Климаты: экваторлық және қоңыржай

Діні: буддизм, ислам, христиандық, шаманизм

 

Ел туралы

 

Қытай Халық Республикасы – Шығыс Азиядағы мемлекет. Ауданы бойынша ел әлемде 4-ші орында. Жағалаулар Шығыс Қытай теңізімен, Сары теңізбен, Оңтүстік Қытай теңізімен және Корея шығанағымен ұласады. 

 

Туристер Хайнанда, Гонконгта, Макаода, Вэйхайда, Гуланьюде демалуды жөн көреді. 

 

Ел аумағында экваторлық, тропикалық, субтропикалық және қоңыржай климат орнаған. Жағажай демалысының маусымы мамырдан қарашаға дейінгі кезең болып саналады.  

  

Ресми тілі – қытай тілі (путунхуа диалектісі). Елдің басқа аймақтарында путунхуадан мүлдем өзгеше 7 қытай диалектісінде сөйлейді.

 

 

 

 

Фестивальдары

 

Қытайда ежелгі аңыздар мен дәстүрлерге негізделген көптеген мерекелер бар. Мерекелері балалар үшін де, ересектер үшін де қызық.

 

Айдаһар қайықтарының фестивалі. Жаздың басында тойланады және ресми демалыс болып саналады. Елдің түкпір-түкпіріндегі өзендерде айдаһар қайықтарының жарысы өтеді. Жарыстан кейін адамдар цзунцзы деп аталатын тағамды жейді. Бұл бамбук жапырақтарына оралған, әртүрлі салмалары бар жабысқақ күріш.

 

Күз ортасының мерекесі. Егін жинау маусымының аяқталуына орайластырылған мереке. Бұл күні адамдар хош иісті заттарды өртеп, аспанға қағаз шамдар жіберіп, айдаһар костюмдерін киіп билейді және тәтті бұршақ немесе лотос дәндерінен тұратын салмасы бар айлы пірәндіктерді жейді.

 

Өнер фестивалі. Гонконгта ақпан – наурыз айларында өткізіледі. Басты сахнада әлемнің әйгілі симфониялық оркестрлері өнер көрсетіп, театрлар үздік қойылымдарын ұсынып, әншілер, балет әртістері, бишілер өнерін жұртшылыққа паш етеді. Бұл іс-шараға билеттерді алдын ала сатып алған жөн.

 

 

Көрнекті жерлері

 

Қытайда кішкентай қонақтардың көңілінен шығатын, сондай-ақ тарих, сәулет, табиғат және ойын-сауық әуесқойларына қызықты болатын көптеген көрнекті жерлер бар.

  

 

Хайнань аралындағы көрнекті жерлер:

 

«Басын бұрған бұғы» саябағы. Бұл саябақ аралдың оңтүстігіндегі, 275-метрлік тауында орналасқан. Таудан Санья қаласының панорамалық көрінісі ашылады. Бұл жердің басты ерекшелігі – үлкен бұғы мүсіні. Мұнда жанды бұғыларды көріп, әдемі табиғатты тамашалап, тіпті маймылдарды кездестіруге болады.

 

Наньшан буддизм орталығы. Санья қаласының маңындағы теңіз жағасында орналасқан үлкен саябақ. Көптеген будда ғибадатханалары, мүсіндері және суретке түсуге болатын әсем жерлері бар. Бұл жердің басты мүсіні – 108 метрлік Гуаньинь әйел-құдайының мүсіні. Аңыздарға сәйкес ол аралды цунами мен тайфундардан қорғайды. Мүсіннің ішіне кіріп, үлкен будда ғибадатханасын көруге болады.

 

Янода саябағы. Саябақ Саньядан 35 км қашықтықта орналасқан. Мұнда сенгісіз сұлу табиғатты, тоғандарды, көлдерді, өсімдіктер мен жануарларды көруге; аспалы көпірмен, сондай-ақ джунгли үстіндегі әйнек көпірмен жүруге; Ли халқының өкілдері көрсететін би шоуын тамашалауға; тарзанкамен сырғанауға немесе банджи-джампингті байқап көруге болады.

 

 

Гонконг қаласындағы көрнекті жерлер:

 

Үлкен Будда мүсіні. Гонконгтан 27 км қашықтықта, Лантау аралында орналасқан. Бұл әлемдегі ең биік отырған Будда мүсіні, оның биіктігі 34 метрді құрайды. Бұл жерге жету үшін әдемі арқанжолмен өтіп, 268 табалдырық бойынша көтерілу керек. Шолу алаңынан Гонконгтың керемет көрінісі ашылады.

 

Диснейленд саябағы. Ересектер мен балаларға арналған қуаныш пен шаттық мекені. Мұнда ересектер мен балаларға арналған көптеген аттракциондарға мінуге; пойызбен немесе қайықпен жүруге; мультфильм кейіпкерлерінің шеруін бақылап, олармен суретке түсуге; музыкалық шоуларды тамашалауға; кәдесыйлар сатып алуға және кешкі отшашуды көруге болады.

 

Ocean саябағы. Мұнда балалар мен ересектерге арналған аттракциондарға мінуге; теңіз мекендеушілері мен түрлі жануарларды, соның ішінде сүйкімді пандаларды көруге; музыканттардың қойылымдарын тамашалауға; арқанжолға және пойызға мініп жүруге; үлкен аквапаркте шомылуға және су сырғанақтарында сырғанауға болады.

 

 

Макао қаласындағы көрнекті жерлер:

 

Әулие Павел соборының қирандылары. XVII ғасырдың соборы. Бастапқы күйінде сақталған қабырғаның бір бөлігінде, бұрынғы кіреберіс орнында, қытай тіліндегі Библиядан алынған үзінділер мен жамылғы киген дін таратушылардың мүсіндерін байқауға болады. Қирандылардың жанында будда ғибадатханасын көруге, сонымен қатар еуропалық үлгіде салынған ғимараттары бар тар көшелермен серуендеуге болады.

 

Чжен отбасысының мұражай үйі. 1869 жылы салынған үйде қытай, португал және үнді сәулетінің ерекшеліктері үйлескен. Үйде 60 бөлме бар, ал оның аумағы 4000 м²  құрайды. Бұл жерде Чжен Гуанин атты қытайлық шенеунік тұрған. Мұражай аумағында көптеген бақтар мен алаңдар орналасқан. Үйдің ішінде ескі жиһаздар, өнер туындылары және кітаптар бар.

 

Grand Lisboa – 47 қабаттан тұратын Макаоның ең биік ғимараты. Сырты алтын түсті лотос гүліне ұқсатып жасалған. Ғимарат ішінде 650 қонақ үй бөлмесі, казино, дүкендер мен барлар бар. Сонымен қатар, ғимарат ішінде көптеген өнер туындыларын көруге болады: піл сүйегінен жасалған Ұлы Қытай қорғаны, алтын қауырсындары бар тауыс мүсіндері, алтыннан жасалған алып айдаһар қайығы және 218 қараттық үлкен бриллиант.

 

 

Ойын-сауықтар

 

Қытай шипажайларында көптеген ойын-сауық түрлері ұсынылған. Сноркелинг және дайвингімен айналысуға; парашютпен немесе тарзанкамен секіруге; круизбен саяхаттауға; серфинг, виндсерфинг немесе кайтсерфингімен айналысуға; акулалармен немесе дельфиндермен жүзуге; теңіз бен құм арқылы жүретін үлкен электрлік гибридті көлікке мінуге; ойын-сауық саябақтарына баруға болады.

 

Тағамдары

 

Қытай тағамдары таңғажайып және ащы дәмдерге, дәмдеуіштерге және ерекше үйлесімдерге толы. Мұнда тұздықтармен дәмделген күріш немесе кеспелерге ет, тауық және теңіз өнімдерін қосып жейді; тәтті және тұзды сорпаларды жақсы көреді; шошқа етінің (миы, құлағы, тұмсығы) және тауық етінің (аяқтары, айдарлары) әдеттен тыс бөліктерін жегенді ұнатады. Дегенмен, кейбір қытай тағамдары бірден ұнап қалуы мүмкін, сол себепті олардың ерекше дәмін татып көруді ұсынамыз.

 

 

Мына тағамдардың дәмін татып көруді ұсынамыз:

 

Пекин үйрегі – дәстүр бойынша бірнеше сағат дайындалатын тағам. Үйректі құпия маринадтарда маринадтап, үстіне қант шәрбатын құйып, сығылған ауамен ісіндіріп, жеміс ағаштарының отынында пісіріледі.

Хого – қытай самаурыны, оның ерекшелігі – тағамды қонақтардың өздері дастарқан басында пісіруінде.  Дастарқанның ортасына екі түрлі сорпасы бар қазан қойылады. Қонақтар өздеріне ұнаған шикі ингредиенттерді таңдап, оларды сорпаға салып, өз қалауы бойынша пісіреді. Ингредиенттер арасында теңіз өнімдері, ет, құс еті, көкөністер, тофу, тұшпара және көк шөптер бар.

Қытай тұшпарасы – ерекше дәмімен және ерекше созылыңқы пішінімен танымал, асшаяндар мен көк шөптердерден, қой еті мен көкөністерден, балықтан жасалған түрлі салмалары бар тағам. Хош иісті дәмдеуіштер тұшпараның дәмін ерекше етеді.

 

 

Мына десерттердің дәмін татып көруді ұсынамыз:

 

Айлы пірәндіктер – күз ортасы мерекесіне арнайы дайындалатын десерт. Бұл ерекше рецепт бойынша дайындалатын үгілмелі қамырдан жасалған пірәндік, ішінде тәтті бұршақ, қытай құрмасы, лотос пастасы немесе айды бейнелейтін пісірілген тауық жұмыртқасынан жасалған салмасы бар.

Жұмыртқа тарталеткасы – суфлеге ұқсайтын дәмді десерт. Оны дайындау үшін жұмсақ әрі уылжыған қамырда көпіршітілген жұмыртқа салмасын пісіру керек.

Карамельдегі жемістер – карамельмен қапталып, ұзын таяқшаларға шаншылған банан, алма, құлпынай, долана, мандарин, манго және басқа да жемістер.

 

 

Жағажайлары

 

Хайнань, Макао және Гонконг жағалауларында демалуға арналған көптеген жағажайлары бар. Мұнда таулармен немесе ағаштармен қоршалған жағажайлар, қара құмды жағажайлар, сондай-ақ алып жартастармен көмкерілген, ежелгі петроглифтерді көруге болатын жағажайлар бар.

  

 

Хайнаньның танымал жағажайлары:

 

Ялунвань жағажайы. Жағалау сызығы кең, суға кіру жолы жайпақ, бірақ тереңдігі күрт артатын жерлері бар. Құмы ақ, суы таза. Маңында көптеген қонақ үйлер, мейрамханалар мен дүкендер орналасқан.

 

Дадунхай жағажайы. Туристер арасында аса танымал жағажай. Бұл жердің суы таза, құмы ұсақ. Суға кіру жолы жайпақ. Дадунхай жағажайында барынша дамыған инфрақұрылым, көптеген мейрамханалар, сауда орталықтары, кафелер, дүкендер және серуендеу аймақтары бар.

 

Хоухай жағажайы. Пальмалармен, үлкен тастармен және таулармен қоршалған жағажай. Бұл серфинг әуесқойларының сүйікті орны, өйткені мұндағы теңіз ондаған метр бойы таяз болып келеді. Жағажай маңында мейрамханалар мен кафелер көшесі орналасқан.

 

 

Жоғары бағаланған Гонконг жағажайлары:

 

Shek O жағажайы. Гонконгтағы ең танымал жағажайлардың бірі. Екі жағынан таулармен қоршалып тұр. Суы таза, суға кіру жолы жайпақ, құмы ұсақ. Жағажайда душ бөлмелері бар, қолшатырларды жалға алуға болады. Демалушылардың қауіпсіздігі үшін құтқарушылар жауап береді.

 

Big Wave жағажайы. Мұнда биік толқындар жиі кездесетіндіктен, жағажай серфингішілерінің сүйікті орнына айналған. Суға кіру жолы жайпақ, ал суы таза. Жағажай таулармен қоршалған. Мұнда душ, киім ауыстыру кабиналары, дәретханалар және барбекю аймақтары қарастырылған. Big Wave жағажайынан кемінде 3000 жылдық петроглифтері бар тастарды табуға болады.

 

Repulse жағажайы. Ақ жұмсақ құмы мен тынық, таза теңізімен ерекшеленетін таңдаулы жағажайлардың бірі. Жағажай жасыл желекпен қоршалған және құмдағы ағаштардың көлеңкесінде демалуға болады. Қауіпсіздік мақсатында жағажайда құтқарушылар қызмет көрсетеді. Жақын маңда үлкен сауда орталығы, мейрамханалар және дүкендер бар.

 

  

Макаоның таңдаулы жағажайлары:

 

Bamboo жағажайы. Алтын құмы мен таза суы бар жайлы жағажай. Жағажайда киім ауыстыратын бөлмелер мен дәретханалар бар; құтқарушылар қызмет көрсетеді. Жағажай жасыл желектермен қоршалған, жағалауында үлкен, бірақ жүзуге кедергі келтірмейтін тастар кездеседі. Жағажайдың жанында көптеген дүкендер мен мейрамханалар бар.

 

Қара құмды жағажай. Лавалық тектен пайда болған құмының қара түсіне байланысты осылай аталған. Суы таза болғанымен, қара құмның әсерінен аздап бұлыңғыр көрінеді. Демалушылары көп емес. Мұнда желкенді қайықтар мен гидроциклдерді жалға алуға болады. Жағажайда дәретханалар, душтар және киім ауыстыратын бөлмелер бар. Жақын маңда мейрамханалар мен дүкендер орналасқан. Бұл жағажайдан бір төбенің ар жағында, хайкинг соқпақтарымен жаяу жетуге болатын Bamboo жағажайы орналасқан.

 

 

Лайфхактар

 

1. Мұнда қызметкерлерге шайпұл қалдырмайды немесе сыйлық сыйламайды. Сіздің сыйлығыңызды қабылдамауы мүмкін.

 

2. Базарда саудаласқан жөн, өйткені сатушылар бағаны 50%-ға немесе одан да артық төмендетуі мүмкін.

 

3. Жолда белгілер, бағдаршам және «зебра» сызығы болғанның өзінде, жүргізушілер көбіне жаяу жүргіншілерді өткізе бермейді. Сондықтан жолды кесіп өткенде, жасыл жарық жанып тұрса да, абай болыңыз! Көліктердің көпшілігі өтіп кеткенше күтіп, содан кейін ғана өтіңіз.