Астанасы: Каир

Тілі: араб

Валютасы: Мысыр фунты (1 EGP ≈ 9,41 KZT)

Уақыты: UTC+2, жазда UTC+3 – Қазақстаннан айырмашылығы 2-3 сағат 

Климаты: тропикалық шөл

Діні: сунниттік ислам

 

Ел туралы

 

Мысыр – Солтүстік Африка мен Таяу Шығыста орналасқан мемлекет. Ел Жерорта және Қызыл теңіздермен ұласады. Ең үлкен қаласы Каир, оған агломерация ретінде Гиза, Шубра-әл-Хейма және басқа қалалар кіреді. 

 

Демалыс үшін ең көп сұранысқа ие қалалар: Хургада, Шарм-әл-Шейх, Дахаб, Нувейба, Табаа, Марса Алам. Бұл қалаларда туристік инфрақұрылым дамыған және көптеген қонақ үйлер мен ойын-сауықтарды, көрнекті жерлердің ауқымды түрлерін табасыздар. 

 

Мысырдың климаты тропикалық шөлді, сондықтан жазда температура көлеңкеде 50 градусқа дейін көтеріледі, ал түнде ол әлдеқайда төмен градусты құрайды. Мұндағы жауын-шашынның түсуі аз. Жағажай маусымы көктемнің соңында басталып, күзге дейін созылады. 

 

 

 

 

Ресми тілі – араб: мысыр және саид диалектілері. Ағылшын, неміс және француз тілдері кең таралған.

 

 

Фестивальдары мен мерекелері

  

Мысырда көп фестиваль өткізілмесе де, бүкіл ел болып тойлайтын мерекелері көп.

 

Нілдің тасуы. Жыл сайын 15 тамызда тойланады. Бұл күні су спорты түрлерінен өткізілетін жарыстарды, гүлдер шерулерін және әртістердің өнер көрсетуін тамашалауға болады.

 

Шам әл-Несcим. 4500 жылдан бері копт Пасхасынан кейін тойланып келе жатқан көктем мерекесі. Бұл күні мысырлықтар отбасыларымен табиғатқа шығып немесе Ніл бойымен қайықпен серуендеп, боялған жұмыртқа, жасыл пияз және тұздалған балық жейді. Қалаларда мерекелік әуен ойнап, көңілді атмосфера орнайды.

 

Шарм-әл-Шейхтегі шоппинг фестивалі. Жыл сайын ақпан және наурыз айларында өткізіледі. Осы уақытта қаладағы ірі сауда орталықтарынан киім-кешек, косметика, тоқыма бұйымдары мен аяқ киімдерді 50%-ға дейінгі жеңілдіктермен сатып алуға болады.

 

Көрнекті жерлері

 

Мысыр өзінің көрнекті жерлерімен әйгілі. Мұнда мыңдаған жылдық ежелгі сәулет ескерткіштерін де, заманауи сәулет туындыларын да тамашалауға болады.

 

Хургада қаласындағы көрнекті жерлер:

 

Гранд аквариум. Мурена, тұтасқанат, акула, теңіз жыланы, тасбақа және түрлі-түсті балықтар сияқты теңіз мекендеушілерін көруге болатын жер. Мұндағы террариум, көпірлер, түнелдер мен суайдындар джунглиде жүргендей сезім сыйлайды.

 

Әл-Мина мешіті. Мешіт 600 жылдан астам уақыт бұрын өмір сүрген жергілікті уағызшы Абдулхасан Әлшазидің құрметіне салынған. Ғимараттың сырты ақ мәрмәрмен, оюлармен және шығыс өрнектерімен безендірілген.

 

Қаңырап қалған Умм-Хувейтат қаласы. ХХ ғасырда пайда болған бұл елес қалаға квадроциклдермен немесе джиптермен жетуге болады. Ол Хургададан 60 км қашықтықта орналасқан. Мұнда қаңырап қалған ақ мешітті, мектепті, аурухананы және фосфат өндірген кеншілердің үйлерін көруге болады.

Шарм-әл-Шейх қаласындағы көрнекті жерлер:

 

Әулие Екатерина монастырі. Бұл ерлер монастырі шамамен 1700 жыл бұрын пайда болған! Мұнда 12 метрлік қабырғаларды, кішкентай шіркеуді, кітапхананы және Преображение базиликасын көруге болады.

 

Синай тауы. Бұл тау үш әлемдік дін үшін қасиетті жер болғандықтан, оның шыңына шығуға көптеген туристер келеді. Тауға 3700 баспалдақпен немесе көтерілу еңісі төмен «Түйе соқпағымен» шығуға болады.

 

Тиран аралы. Арал маңайында аквалангімен сүңгуге болады, бірақ аралдың өзіне шығуға тыйым салынған. Жергілікті мөлдір таза суда әдемі суасты рифтері мен жартастар орналасқан, сондай-ақ мұнда тасбақалар, түрлі-түсті балықтар мен дельфиндер мекендейді.

Дахаб қаласындағы көрнекті жерлер:

 

Түрлі түсті шатқал. Дахабтан 50 шақырым жерде орналасқан. Шатқалдың қаладан қашық орналасқанына қарамастан, оны көруге әлемнің түкпір-түкпірінен туристер келеді. Бұл миллиондаған жылдар бұрын пайда болған қысаң шатқал. Жартастарда марганец пен темір тотығының сеппелері болғандықтан, шатқал күмістен қызылға дейінгі әртүрлі түстермен құбылады.

 

Үш лагуна. Дахаб қаласынан 15 км қашықтықта орналасқан. Бұл жердің ерекшелігі – үш лагунаның температурасы да, оларды мекендейтін тіршілік те әртүрлі. Бұл жер дайверлердің сүйікті орнына айналған, себебі су астында балық мурена, барракуда, сегізаяқ, тасбақа, дельфин сияқты жануарлар мен маржан бағын көруге болады.

 

Айн-Худра жазирасы. Жартастармен қоршалған, пальмалар өсетін жер. Аумағында бассейн мен кафе бар. Жазираның маңында көруге тұрарлық Ақ шатқал орналасқан.

Ойын-сауықтар

 

Инфрақұрылымы дамыған мысырлық қалаларда туристерге көптеген ойын-сауық түрлері ұсынылады. Дельфиндермен бірге жүзуге, шөлде сафари-турға шығуға немесе желкен яхтасында круиз жасауға, дайвингімен немесе сноркелингімен айналысуға, ат пен түйе мінуге, қолтырауын шоуын тамашалауға, аквапарктерде көңіл көтеруге болады.

Тағамдары

 

Мысыр өркениетінің пайда болғанына 6000 жылдан асты. Мыңдаған жылдар ішінде елдің дәстүрлі тағамдары грек, араб, осман, ағылшын, француз және басқа да халықаралық тағамдардың ерекшеліктерін бойына сіңірді. Тек Мысырда кездесетін, басқа жерде табылмайтын тағамдар бар. Олардың дәмін татып көруге кеңес береміз.

 

Мына тағамдардың дәмін татып көруді ұсынамыз:

 

Фул медамес. Мысырлықтардың дәстүрлі таңғы асы. Алдын ала суға малынған бұршақтарды бұқтырып, май, сарымсақ, паприка және қызанақ тұздығын қосып дайындайды.

Саядия фиш. Бұл ақ балық, сары күріш, пияз және томат тұздығы қосылған палау. Тағамға даршын, ақ бұрыш, араб хош иісті бұрышы, кардамон, зире, лимон шырыны қосылады.

Молохия. Құлқайыр жапырақтарына қоян, тауық немесе қозы етін қосып дайындалатын жасыл түсті сорпа. Сорпа мысырлық бидай наны немесе күрішпен бірге ұсынылады.

 

Мына десерттердің дәмін татып көруді ұсынамыз:

 

Атайф. Ақ ұннан жасалған, кілегей немесе жаңғақ салмасы бар мысырлық құймақтар. Оларды қант шәрбатына немесе балға батырып жейді.

Басбуса. Бұл – қант шәрбаты мен апельсин суымен сіңдірілген, жармадан және йогурттан жасалған уылжыған әрі үгілгіш торт.

Масфуф. Қайнатылған кус-кусқа мейіз, жаңғақтар, балғын жемістер мен жүгері қосып дайындалатын десерт.

Жағажайлар

 

Мысырда көптеген жағажайлар бар, оладрың көбісі қонақ үйлердің маңында орналасқан. Мұнда құмды және тасты жағалаулар да кездеседі, суға кіру жолы жайпақ және жайпақ емес, ақылы және тегін жағажайлар бар.

 

Хургаданың таңдаулы жағажайлары:

 

Fairuza жағажайы атымен белгілі №5 қоғамдық жағажай. Хургададағы үздік ақылы жағажайлардың бірі. Қолшатырлары мен шезлонгылары, ойын алаңдары мен киім ауыстыратын бөлмелері бар. Жағалауы құмды, жұмыр тастар кездеседі.

 

Да Винчи жағажайы. Суға кіру жолы жайпақ, қолайлы демалуға арналған барлық нысандары бар малтатасты жағажай. Жағажайда сауық кештер жиі өткізіледі.

 

№9 қоғамдық жағажай. Демалуға арналған қолшатырлары және шезлонгылары бар әдемі жағажай. Жағажай демалушылары қайықпен жүзіп, дайвингімен айналысып, балық аулай алады.

 

Жоғары бағаланған Дахаб жағажайлары:

 

Lighthouse орталық жағажайы. Жағажай маңындағы теңіз тынық, бірақ жағадан шамамен 10 метр қашықтықта су өте терең. Жағажай айналасында көптеген кафелер мен мейрамханалар орналасқан, шезлонгылары мен қолшатырлары бар.

 

Қоғамдық жағажай. Демалуға қажеттінің бәрімен жабдықталған ақылы жағажай. Жағажай құмы таза, теңізге кіру жолы жайпақ.

 

Көк ойық. Бұл жағажай дайвинг пен снорклингімен айналысуға арналған үздік жерлердің бірі. Жағажайлық демалыс үшін аса қолайлы емес. Бұл жердің барлық сұлулығы су астында, түрлі-түсті маржандар арасында жасырылған. Суы өте терең, осының арқасында көгілдір түсті судан көптеген теңіз мекендеушілерін көруге болады.

 

Шарм-әл-Шейхтің танымал жағажайлары:

 

Майя-Бэйдегі жағажай. Шезлонгылары мен қолшатырлары бар тегін, таза жағажай. Суға кіру жолы жайпақ, құмы алтын түстес. Суда маржандар кездеседі. Демалушыларға балалар ойын алаңдары мен аниматорлар қызмет көрсетеді.

 

Әл Фанар жағажайы. Ақылы, ұсақ құмды қоғамдық жағажай. Кіру бағасына сүлгі, шезлонг, қолшатыр және бір бөтелке суды жалға алу ақысы кіреді. Бұл жер желден қорғалған, сондықтан теңізі тынық. Дайвинг және сноркелингімен айналысу үшін қолайлы.

 

Риф Бич. Жағалауында барлық ыңғайлы нысандары бар жартасты жағажай. Суға кіру жолы әдеттегідей емес, оған айлақтан секіріп, баспалдақпен қайта көтерілуге болады. Жағажай тек тәжірибелі жүзушілерге арналған.

Лайфхактар

 

1. Маржаннан қорғайтын арнайы аяқ киімді алдын ала сатып алған жөн. Олар суға шомылу немесе снорклингімен айналысу кезінде аяқты маржандарға жарақаттап алмау үшін қажет болуы мүмкін.

 

2. Теңіз мекендеушілерін қолмен ұстамаған жөн, өйткені кейбіреулерінің шаққаны өмірге қауіп төндіруі мүмкін.

 

3. Мысырда шайпұл қалдыру міндеттелмейді, бірақ құпталады. Кейбір қонақ үйлердің бөлмелерінде қызметшіге шайпұл қалдыруды сұрайтын белгішелер қойылады, сол жерге 10 – 20 фунт қалдырған жөн.